ന്യൂഡല്‍ഹി: രാജ്യത്ത് ആയുഷ്മാന്‍ ഭാരത് ഡിജിറ്റല്‍ മിഷന് പദ്ധതി പ്രധാനമന്ത്രി നരേന്ദ്രമോദി ഉദ്ഘാടനം ചെയ്തു.
എല്ലാ ഇന്ത്യക്കാരനും പ്രത്യേക ഡിജിറ്റല്‍ ആരോഗ്യ തിരിച്ചറിയല്‍ കാര്‍ഡ് നല്‍കുന്നതാണ് പദ്ധതി.
ആയുഷ്മാന്‍ ഭാരത് പ്രധാനമന്ത്രി ജന്‍ ആരോഗ്യ യോജനയുടെ മൂന്നാം വാര്‍ഷികം ആഘോഷിക്കുന്നതിന്‍റെ ഭാഗമായാണ് ദേശീയതലത്തില്‍ ആയുഷ്മാന്‍ ഭാരത് ഡിജിറ്റല്‍ മിഷന് തുടക്കം കുറിക്കുന്നത്. 2020 ആഗസ്റ്റ് 15ന് ആയുഷ്മാന്‍ ഭാരത് ഡിജിറ്റല്‍ മിഷന്‍റെ പൈലറ്റ് പദ്ധതി പ്രധാനമന്ത്രി പ്രഖ്യാപിച്ചിരുന്നു.
*ആയുഷ്മാന്‍ ഭാരത് ഡിജിറ്റല്‍ മിഷന് പദ്ധതി*
പദ്ധതിയിലൂടെ ഓരോ പൗരനും ഒരു ആരോഗ്യ ഐ.ഡി നല്‍കും. അത് അവരുടെ ആരോഗ്യവിവരങ്ങള്‍ അടങ്ങിയ അക്കൗണ്ടായിരിക്കും.
ഇതിലേക്ക് വ്യക്തിഗത, ആരോഗ്യ രേഖകള്‍ ബന്ധിപ്പിക്കും. ഇത് മൊബൈല്‍ ആപ്ലിക്കേഷന്‍റെ സഹായത്തോടെ കാണാനാകുമെന്ന് കേന്ദ്രസര്‍ക്കാര്‍ പറയുന്നു.
ഹെല്‍ത്ത് കെയര്‍ പ്രഫഷനല്‍സ് രജിസ്ട്രി, ഹെല്‍ത്ത് കെയര്‍ ഫെസിലിറ്റീസ് രജിസ്ട്രി എന്നിവ ഇതിന്‍റെ ഭാഗമാകും. എല്ലാ ആരോഗ്യസേവന കേന്ദ്രങ്ങളിലും ഇവ ലഭ്യമാകുകയും ഡോക്ടര്‍മാര്‍/ ആശുപത്രികള്‍, ആരോഗ്യ പരിപാലന സേവന ദാതാക്കള്‍ തുടങ്ങിയവ ഇതിന്‍റെ ഭാഗമാകുകയും ചെയ്യും.
രാജ്യത്തെ ജനങ്ങള്‍ക്ക് വളരെ എളുപ്പത്തില്‍ ആരോഗ്യരംഗത്തെ സേവനങ്ങള്‍ ലഭിക്കാന്‍ സഹായിക്കുകയാണ് ലക്ഷ്യം.
14 അക്ക തിരിച്ചറിയല്‍ നമ്ബറാണ് ഡിജിറ്റല്‍ ആരോഗ്യ ഐ.ഡിയായി പ്രവര്‍ത്തിക്കുക. ഇതിലേക്ക് ആശുപത്രിയില്‍ എത്തുന്നതിന്‍റെയും പരിശോധനകള്‍ നടത്തുന്നതിന്‍റെയും വിവരങ്ങളും പരിശോധന ഫലങ്ങളും ഡോക്ടറുടെ നിഗമനങ്ങളും കൂട്ടിച്ചേര്‍ക്കും.
വ്യക്തികള്‍ക്കും ആരോഗ്യകേന്ദ്രങ്ങള്‍ക്കും ഒരുപോലെ ഇവ ഉപയോഗിക്കാനാകും. കൂടാതെ എളുപ്പത്തില്‍ ഒരു വ്യക്തിയുടെ ആരോഗ്യവിവരങ്ങള്‍ ലഭ്യമാകും. അതേസമയം ആധാറുമായി ഇവ ബന്ധിപ്പിക്കല്‍ നിര്‍ബന്ധമല്ലെന്നാണ് കേന്ദ്രസര്‍ക്കാറിന്‍റെ നിലവിലെ അറിയിപ്പ്.
ജന്‍ധന്‍, ആധാര്‍, മൊബൈല്‍, സര്‍ക്കാറിന്‍റെ മറ്റ് ഡിജിറ്റല്‍ സംരംഭങ്ങള്‍ എന്നിവയുടെ അടിസ്ഥാനത്തില്‍ ആയുഷ്മാന്‍ ഭാരത് ഡിജിറ്റല്‍ മിഷന് ഡേറ്റയും വിവരങ്ങളും നല്‍കിയാണ് ഓണ്‍ലൈന്‍ പ്ലാറ്റ്ഫോം സൃഷ്ടിക്കുക. അടിസ്ഥാന സൗകര്യ സേവനങ്ങള്‍, ഓപ്പണ്‍, സ്റ്റാന്‍ഡേന്‍ഡ് അധിഷ്ഠിത ഡിജിറ്റല്‍ സംവിധാനങ്ങള്‍ ഇതിനായി പ്രയോജനപ്പെടുത്തും. കൂടാതെ വ്യക്തിഗത വിവരങ്ങളുടെ സുരക്ഷ, രഹസ്യസ്വഭാവം, സ്വകാര്യത തുടങ്ങിയ സംരക്ഷിക്കുമെന്നും പറയുന്നു. പൗരന്മാരുടെ രേഖാമൂലമുള്ള ആരോഗ്യ രേഖകള്‍ അവരുടെ സമ്മതത്തോടെ കൈമാറ്റം ചെയ്യാനും പ്രാപ്യമാക്കാനും മിഷന് സഹായിക്കുമെന്നും കേന്ദ്രം പറയുന്നു.