കൊച്ചി: സംസ്ഥാനത്ത് യുവാക്കൾക്കിടയിലും സ്കൂൾ വിദ്യാർത്ഥികൾക്കിടയിലും നിരന്തരമായി അക്രമങ്ങൾ വർധിക്കുന്ന സാഹചര്യത്തിൽ മാർക്കോ സിനിമക്കെതിരെ ഉയർന്ന വിമർശനങ്ങളോട് നിർമ്മാതാവ് ഷരീഫ് മുഹമ്മദ്‌ പ്രതികരിച്ചു. മാർക്കോ പോലത്തെ വയലൻസ് നിറഞ്ഞ സിനിമകൾ ഇനി ചെയ്യില്ലെന്ന് ഷരീഫ് മുഹമ്മദ്‌ പറഞ്ഞു. വയലൻസിനെ പ്രോത്സാഹിപ്പിക്കണമെന്ന ഉദ്ദേശത്തോടെ ചെയ്ത സിനിമയല്ല മാർക്കോയെന്നും സിനിമയെ സിനിമയായി പ്രേക്ഷകർ കാണുമെന്നാണ് കരുതിയതെന്നും അദ്ദേഹം പ്രതികരിച്ചു. വയലൻസ് നിറഞ്ഞ കുറച്ചു സീനുകളൾ വരാൻ ഇരിക്കുന്ന കാട്ടാളൻ എന്ന സിനിമയിലും ഉണ്ട്. മാർക്കോയിലെ കഥയുടെ പൂർണ്ണതക്ക് വേണ്ടിയാണ് അതിക്രൂരമായ വയലൻസ് ദൃശ്യങ്ങൾ ഉണ്ടാക്കിയത്. അതൊരു സിനിമാറ്റിക് അനുഭവമായി കാണാൻ ശ്രമിക്കണം എന്നും അദ്ദേഹം പറഞ്ഞു. മാർക്കോയിലെ ഗർഭിണിയുടെ സീൻ സിനിമക്ക് ആവശ്യമുള്ളതായിരുന്നു. കള്ളം പറയാതിരിക്കാനാണ് "ഏറ്റവും വയലൻസ് ഉള്ള സിനിമ" എന്ന പരസ്യം സിനിമക്ക് കൊടുത്തത് . മാർക്കോ 18+ സർട്ടിഫിക്കറ്റ് ഉള്ള സിനിമയാണെന്നും അത് കാണാൻ കുട്ടികൾ ഒരിക്കലും തിയേറ്ററിൽ കയറരുതായിരുന്നുവെന്നും അദ്ദേഹം പറഞ്ഞു.
അതേസമയം കേരളത്തിലെ യുവതലമുറയില്‍ വര്‍ധിച്ചുവരുന്ന അക്രമസംഭവങ്ങൾക്ക് മാര്‍ക്കോ പോലുള്ള സിനിമകള്‍ കുട്ടികളിൽ വലിയ സ്വാധീനം ചെലുത്തുന്നുവെന്ന ചര്‍ച്ചകള്‍ ഇപ്പോൾ സജീവമാകുകയാണ്. ഈ പശ്ചാത്തലത്തിൽ സിനിമ ടെലിവിഷനിൽ മാർക്കോ പ്രദർശിപ്പിക്കാനുള്ള അനുമതി ഫിലിം സര്‍ട്ടിഫിക്കേഷന്‍ ബോര്‍ഡ് നിഷേധിച്ചു. സിനിമയുടെ ഒ ടി ടി പ്രദര്‍ശനം തടയണമെന്ന് ആവശ്യപ്പെട്ട്കൊണ്ട് ഫിലിം സര്‍ട്ടിഫിക്കേഷന്‍ ബോര്‍ഡ് കേന്ദ്ര സര്‍ക്കാരിന് കത്തയച്ചു.നടപടി സിനിമ ‘എ’ സര്‍ട്ടിഫിക്കറ്റ് ആയതുകൊണ്ടാണെന്നും അറിയിച്ചു. തിയേറ്റർ പ്രദര്‍ശനത്തിനായി. മാര്‍ക്കോയ്ക്ക് സര്‍ട്ടിഫിക്കറ്റ് നല്‍കേണ്ടെന്നായിരുന്നു കേരളത്തിലെ കമ്മിറ്റിയുടെ തീരുമാനമെന്നും വിശദീകരണം പുറത്തുവന്നിട്ടുണ്ട്.
കഴിഞ്ഞ വര്‍ഷം മലയാളത്തിൽ ഏറ്റവുമധികം കളക്ഷന്‍ നേടിയ ചിത്രങ്ങളിൽ ഒന്നാണ് മാര്‍ക്കോ. ഹനീഫ് അദേനിയാണ് മാർക്കോ സംവിധാനം ചെയ്തത്.ചിത്രം കേരളത്തിൽ ഡിസംബർ 20നാണ് റിലീസിനെത്തിയത്. തിയേറ്ററിലെത്തിയ ഈ ചിത്രം ഇന്ത്യയിലെ ഏറ്റവും വയലന്‍സ് നിറഞ്ഞ ചിത്രമെന്ന ടാഗ്‌ലൈനോടുകൂടി വന്ന ഈ സിനിമ 100 കോടിയോളം കളക്ട് ചെയ്തിരുന്നു. ബോളിവുഡ് സിനിമകളായ കിൽ ,അനിമൽ തുടങ്ങിയ സിനിമകൾക്ക് സമാനമായ എ സർട്ടിഫിക്കറ്റ് ആണ് സെൻസർ ബോർഡ് മാർക്കോയ്ക്ക് നൽകിയിരുന്നത്.
എന്നാല്‍ സിനിമയ്ക്കെതിരെ ഈ അടുത്തിടെ മന്ത്രി ഗണേഷ് കുമാർ അടക്കം രംഗത്തെത്തിയിരുന്നു. ഇത്തരം സിനിമകൾക്ക് പ്രദർശനം അനുവദിച്ച സെൻസർ ബോർഡിനെയും മന്ത്രി ഗണേഷ് കുമാർ വിമർശിച്ചിരുന്നു. ചോര തെറിപ്പിക്കുന്നതിനെ ഹരം പിടിക്കുംവിധം അവതരിപ്പിക്കുന്നത് ശരിയല്ലെന്നായിരുന്നു ഗണേഷ് കുമാറിന്‍റെ നിലപാട്. സിനിമാ മേഖലയിലെ മറ്റ് താരങ്ങളും ഇതിനെ പിന്തുണച്ച് രംഗത്തെത്തിയിരുന്നു.